الخميس، 31 ديسمبر 2009

happy new year +اطرف ما انتهت بيه 2009+عزاء


السلام عليكم
ع الرغم من انى مش من الناس الى بتحتفل براس السنة والحجات دى
بس جيت اقولكم كل سنة وانتم طيبيبن يارب والسنة الجاية كل واحد يعرف يحقق الى معرفش يحققه
فى 2009 وكل سنة وربنا رافع راية الاسلام فى كل انحاء الارض , واكيد الكل بيحلم السنة الجاية يكون
حكام العرب اتحدوا ونعرف باذن الله نحرر المسجد الاقصى عارفه انه حلم بعيد شوية بس نامل انه يتحقق
قريب .
----------------------------------------
وبمناسبة السنة الجديدة وان هم يضحك وهم يبكى هرغى معاكم شوية واحكيلكم ع كام موقف بجد متهيئليش
انى ممكن انساهم وخصوصا انهم حاصلوا فى اخر يوم فى السنة انهرده بالظبت قبل ما اكتب البوست بحوالى 3
4 سعات .....
اليوم فاضى عادى واعده فى البيت واتخنقت من الروتين بتاع كل يوم فقولت اخرج وياريتنى مخرجت ولا حبيت
اكسر الروتين حتى هههههههههه اول مفجاة تحاصل فى اول الخروجة .
الموقف الاول
(ماشية فى امان الله وبتكلم مع اختى وبنت عمى والدنيا كانت زحمة جدا المهم تليفون اختى رن
ففتكرت انى عوزة اعمل مكالمة فبفتح الشنطة عشان اطلع التليفون كانت المفجاة وادور ع التليفون
مش موجود التليفون ووووووواااااااااءءء ايقنت باه ان التليفون اتسرق ايوه اتسرق والخروجة ابتدت
بالموقف اللطيف دا المهم وارن ع التليفون فثوانى اتافل المهم بجد اتحرق دمى بشكل التليفون دا ع الرغم انه
مكنش قيم اوى بس كان غالى عليا اوى عشان كان جيلى هدية من خالى وخلاص شوية وحعيط ويقولول خلاص
حتعملى يعنى خد الشر وراح وانا قلبتها غم وحبوظلهم الخروجة قولت الم الدور باه حعمل ايه فعلا خلاص هو راح
وربنا يعوض عليا وووواااااءءء مصعبتش ع حد طبعا لو حد عنده تليفون زيادة يسلفهولى شوية ع بال مجيب
واحد جديد هههههه ) .
الموقف التانى
(خلاص الموقف الى فات عدى والدنيا مشيت عادى , مشيين فى امان الله وجات وحدة ست شحاته
المهم عايزة فلوس وكده اختى اديتها وخلاص مشيت شوية ووقفنا نتفرج فى محل ع لبس ولقيت الست
جاية تانى وربنا يستر حاجة لله وربنا يكرمك ياست الله يسهلك مفيش وربنا يرزقك مفيش ولا مقصر
معاها حاجة والغريب كل الشحتين الى شوفتهم فى حياتى تقولهم الله يسهلك يمشوا دى لا لزقت قولت امشى
انا باه راحت الست ماشية ورايا ومسكانى من ايدى وربنا يكرمك ومش راضية تسيبنى وانا حموت من الضحك
ومش قادره امسك نفسى وهى شغاله دعاء , انا اساسا ضد ان حد يدى فلوس للناس الى بيشحتوا فى الشارع
دول لاننا كدا بنشجعهم اكتر انهم يتمدوا فلى بيعملوا فى وسائل كتير ممكن الناس تساعدهم بيها لو هما محتاجين
غير انهم يطلبوا بالشكل الى مش فى كرامة دا ).
الموقف التالت
( واحنا رجعين باه نازلنا من الترام والمسافة بينه وبين البيت مش تاخد حوالى ربع ساعة كده عشر
دقايق بس كنا خلاص مش قادرين نمشى ومفيش مواصلات فى السكة دى غير المواصلة العجيبة الجديدة
دى الى اسمها توكتوك المهم امرنا لله نركب وخلاص حنعمل ايه يعنى والمهم وصلنا عند البيت
ع اول الشارع وبندى للراجل2 جنية واحنا نازلين مسافة صغيرة جدااا طلع استغلالى لا عاوز كمان2 جنية
عليهم وقولتله دا ع اساسا اننا مثلا راكبين تاكسى ولا ايه قالى هو كدا وانا باه مكرهش حاجة فى حياتى قد
الاستغلال وافلت معايا ان مفيش غير 2 جنية دول وراجل دماغه والف تيييييييييت انه ميمشيش غير لما
ياخد 2 جنيه كمان قولتله انت حر المهم يقولولى يابنتى خلينى نخلص ونمشى نديله الفلوس وخلاص وهى مرة
وتعدى وانا ابدا ورحت قولتلهم يلا وسيبناه ومشينه اعد ينادى ويزعا قولتله مع نفسك باه . )
----------------------------------------------------------
تقريبا الناس كلها كانوا مستقصدينى انهارده هههههههه
يلا كل سنة وكل المدونين بخير وكل سنة وعالم التدوين
احسن.
--------------------------------------------------------
عزاء :
ابن خال الجوكر من فريق شباب اون لاين توفى البقاء لله يا جوكر وربنا يرحمه يارب ويسكنه
فسيح جناته ويارب تكون اخر الاحزان باذن الله .
------------------------------------------------
بقلم shemo
اخر يوم من 2009
31\12\2009
وليلة راس السنة 2010 .

الأحد، 13 ديسمبر 2009

بحلم

تنوية :هذا البوست ليس له علاقة بحالتى الشخصية او اى مود انا بعيشه تلك الكلمات مجرد كلمات
. رحلت عن خاطرى لكى تكون شخبطة ع احدى اوراقى الخاصة
_______________________________________________________


بحلم بحلم بيحلمه كل البشر
بحلم بحضن دافى يضمنى
بحلم بايد تمسح دموعى وهى نازلة تبقى عارفه حزنهم
بحلم بقلب عارف معنى كلمة صادقة فى يوم انا قولتها
قلب يقدر يفسر معنى كلمة بحبك اللى فى يوم انا عيشتها
بحلم بكلمة حبيبى اقولها يوم وانا مش خايفة منها
بحلم بيك وليك ومعاك
وحفضل احلم و ادور عليك
واحلم لحد ملاقيك ولو حلمى ضاع فى يوم
حفضل حفظة اسمك حفظة رسمك ومش حقول كلمة بحبك الا
ليك
. يا اغلى حاجة حلمتها
_____________________________________________
عيد ميلاد
دودو عاشقة الرومنسية حبيت اقولها عندى هنا
(كل سنة وانتى طيبة ياقمر وعقبال مليووون سنة )
____________________________________________
بقلم shemo
14\12\2009

الثلاثاء، 24 نوفمبر 2009

تاج من ميروووو + كل سنة اونتم طيبين



السلام عليكم

الاول كل سنة وانتم طيبين يارب وبالف صحة و سلامة وخلبلكم من الصحة بذات
عشان اللحمة الكتيررر
جالى تاج من ميرووو حبيبة قلبى واول مرة تدينى هدية ومينفعش اكسفها
بسم الله نبدا التاج وربنا يسهلها
_____________

اسمك ؟
شيماء .
-
سنك؟
16 سنة .
-
اسم مدونتك ؟
shababik.
-
مجال دراستك ؟
ثانوى عام علمى رياضة بعيد عنكم
ههههههه.
-
هل فكرت فى اغلاق مدونتك ؟والسبب؟
لا مفكرتش قبل كده فى اغلاق المدونة
يبقى اكيد مفيش سبب
ههههههههه.
-
ايه رد فعلك لو حد اقل ادبه عليك فى المدونة ؟
مش حرد عليه وححذف التعليق
لانه مش يستحق ارد عليه اساسا .
-
اسوا مدونة دخلتها ؟
هى مدونة مكنتش اعرف محتواهم وطلع المحتوى خارج
بدون ذكر اسماء طبعا وربنا يهدى الجميع .
-
هيحصل ايه لايميلك بعد ما تموت؟
اكيد حيتافل و حيموت معايا
-
اديت الباسورد لحد قبل كده ؟
اه اديته لشخصين ومازال معاهم
عشان قريبين منى اوى .
-
السفر بالنسبة ليك ؟
مكان جديد بغير فيه جو
وبشوف حجات جديدة ممكن اكون مشفتهاش قبل كده
ممكن اتعرف ع ناس جديدة فيه وقضى وقت ممتع مع صحابى وقريبى لناس الى بحبهم
-
المود بتاعك ايه؟
متقلب دايما
مجنونة لحد ما.
-
بتعمل ايه فى وقت الفراغ؟
بفتح نت
برسم
بصمم ودا بقليل جدا دلوقتى
بقرا مدونات بتبعها
بحفظ قران
برد ع التعليقات الى عندى فى المدونة
-
الاكلات المفضله؟
ايوه كده هى دى الاسئل ولا بلاش
هههههههه
عندى مزاج اوى فى الاكل
السمك
الكبدة الاسكندرانى
كشرى المصرى
فى كتير بس كفاية كده
-
الصفات اللى اخدتها من والدتك ؟
حب الناس
و الطيبة
والوضوح
والاجتماعية
-
الصفات اللى اخدتها من والدك؟
حب التطلع والمعرفة
العصبية
الاهتمام بالذات لحد ما
-
اكثر ست حاجات بتحبهم؟
الرسم
مجال الازياء
البحر
الاحلام
الوضوح
المشى
-
اكتر ست حاجات بتكرههم؟
التافهه
الخيانه
الكدب
الصحاب الاندال
انى اركب الترام والدنيا زحمه
فصل الشتا
-
شخصيتك نوعها ايه؟
طموحة
حالمة
متمردة لحد ما
اجتماعية
-
لماذا دخلت عالم التدوين من الاساس؟
عجبنى وحسيت انى ممكن استفاد منه شخصيا
بالتعرف ع ناس جديدة عندهم فكر مختلف ومتنوع وناضج
عشان اخرج فيه طاقتى من كتابة واحساس وشارك بفكر
ممكن يضيف ولو لشخص واحد حاجة جديدة .
-
اهميه التعليقات بالنسبه لك؟
بفرح بيها اوى وبتعرفنى رايى الى حواليا فى فكرى
وبهتم بعددها واعمل مقارنه بين البوستات
واعداد التعليقات فيها
وخصوصا لما حد يعلق يكون يهمنى رايى
وبستفاد منه
والتعليقات الجديدة بفرح بيها اوى لانها بتعرفى انى مش وقفة فى مكانى
وفى ناس جديدة بتوصلى .
-
احلى بوست كتبته؟ مع ذكر السبب؟
بوست تذكرت ووثقت
السبب:انه بجد كان بيعبر عن احساس جوايا حسيته وطلعته
فى الكلام الى كتبته فى البوست
-
افضل مدونه قريتها؟
تقريبا كل المدونات الى بتبعها
مش مسالة الافضل لكن كل واحد عنده فكره الخاص
المختلف عن الاخرين وفيه حاجة بتميزه
-
اهميه الانترنت بالنسبه لك؟
تقريبا جزء من حياتى الخاصة
لما ببعد شوية بحس انى منقطعه عن الناس
-
اهداء التاج ؟
مش عايزة ادبس حد ويكسفنى عشان عارفه ان التاج دا مر ع امة
لا اله الا الله
ههههههههه
فالى يدخل ويعجبه التاج يخده زى بيتكم محدش يتكسف
ههههههههه
_______________________________
الى يدخل مينساش يسيب العدية
ولحمة لو فى ميخسرش هههههههههه
اجابات بقلمى انا shemo

الثلاثاء، 3 نوفمبر 2009

الثقة


السلام عليكم
.
سؤال محيرنى وعاوزة افكر بصوت عالى فى معاكوا
.
الثقة
.
هو دا السؤال
.
التجربة بتجبر الانسان انه يوقف وقفه فى حياته من كل حاجة حواليه شخصيته وعلاقته بالناس
.
وقفه من ردود افعاله حتى نواية اتجههم .
.
مهما كانت التجربة تافهة او صغيرة من وجهة نظرة او حتى من وجهة نظر الى حواليه الا ان كل تجربة
.
مهما كان حجمها بتفجر اسئلة جواه وبتسيب بصمه فيه .
.
ممكن يكون الى مريت بيه من وجهة نظر الى حواليا تجربه صغيرة
.
لكنها اثرت فيا كتير وخلتنى حد شايف الدنيا والناس من زاوية جديدة وفجرت جوايا اسئلة منها
.
الى عرفت اجاوب عليها ومنها الى مش ليقلها اجابة او بمعنى اصح مش لقيلها مقياس عشان اعرف اجابتها
.
ازاى ممكن تثق فى حد؟
.
الثقة ليها معايير الخبرة للشخص بتفرق فى حجم ثقته للناس الى حواليه؟
.
هل ممكن تكون الاجابة ان فى زمانه دا مينفعش نثق فى حد؟
.
ولا ممكن يكون فى اجابة تانية غير دى مقنعة
.
عاوزة اعرف رايكم اكيد فى ناس منكم اكبر منى سنا واكتر منى خبرة وتجارب وحيكون عندهم زوايا
.
مختلفة عن الموضوع وفكرة اعمق عنه.
.
______________________________________________________
غيبت شوية ووحشتنونى موووت بس اكيد الكل عارف سبب الغياب
.
طلب صغنون: الى يخش البلوج يدعيلى دعواية صغنونه بالتوفيق.
.
shemo بقلم

الخميس، 8 أكتوبر 2009

انتبهوووووووو


من ملك القلب ملك العقل

.


joker

الأحد، 27 سبتمبر 2009

تذكرت ووثقت


جلست في زاوية من غرفتها
تضم احد عرائسها الى صدرها
بدات الدموع تنهمر من عينها
تذكرت ما مضى من حياتها

شعرت بالوحدة تملىء كيانها
احسست بالخوف يملىء قلبها
وفجاة تذ كرت ثقتها بربها
فبدات ترسم لنفسها طريقا من نور فى طاعته
ترسم مستقبل جديد لحياتها ملىء بالصدق
بعيدا عن غدر بنى البشر
توسلت الى ربها ان يستجيب دعاءها
ان يحقق امالها واحلامها .

***************************************
بقلم shemo

الاثنين، 21 سبتمبر 2009

ولكن عفوك اعظم



فلما قسا قلبى وضاقت مذاهبى


جعلت الرجا منى لعفوك سلما


تعاظمنى ذنبى فلما قرنته


بعفوك ربى كان عفوك اعظما


فما زلت ذا جود وفضل ومنة


تجود وتعفو منة وتكرما

________________________________

منقول للامانة

shemo

الثلاثاء، 15 سبتمبر 2009

A DAY



السلام عليكم
جاية اسلم عليكم وحشتونى اوى مضيقة شوية بس مش جاية اضيقكم
عاوزة اوريكم صور ممكن يكون كتير منكم راحوا المكان دا بس المختلف
فى اليوم ده ان صورت فيه الصور دى كان يوم حلو جدا لاننا كنا بنتصرف بجنان
كان معايا المشرفة التانية لمدونة
مصر فى خطر (Sara)
احنا مش صحاب بس احنا
قريب كمان واخويا واخوها .اعدين فى امان الله بنتسحر والجو تحفة فوق السطح
طلعت فى دماغنا اننا
نخرج بكره بدرى عشان هى ماشية تانى يوم قولنا مش حنام اعدنا لحد الفجر صلينا
واعدنا نرغىىى كتيرما ادراكم وما رغى البنات هههههههه المهم جات الساعة
7 لبسنا وماشينا. ماشيين من البيت اساسا عايزين ننام بس جنان باه وخلاص
روحنا مكتبة اسكندرية كان يوم حلو اوى صورنا الصور دا واتفقنا اننا حنزلها
بوست مشترك فى المدونتين يعنى حتلاقوا نفس البوست دا هناك .
رجعنا الساعة 3 العصر هما راحوا ناموا وانا رحت الدرس وكان عندى كيميا
وااااااااااااء بقيت بحقد عليهم ههههههههههه كفاية رغى باه .
واسيبكم تشوفا الصور .

جزء من المكتبة من جوا

لوح حجرى كده عجبنى شكله

عجبنى شكل المكتبات ورا بعض

تماثل عجبنى ومحدش يسئل بتاع مين ههههههه

غلاف كتاب عجبنى شكلة ومحدش برده يسئل

عن ايه عشان مقراتش حاجة فيه هههههههه

جزء من المكتبة الدور الموازى للارض

القبة السماوية من بره

shemo

الاثنين، 7 سبتمبر 2009

stop




بناء على طلب من شيمو انا هنزل البوست ده
.
انا كنت منزله بتاريخ 07/09/29 وهو بوست عزيز عليا اوووى
.
نقول ازيكم الاول : اما انا فالحمد لله بخير انا وباقى الشله نخش فى الموضوع بقى كنت قاعد كالعاده بفكر فى المستقبل وياترى ايه الى ربنا

.
كتبهولنه ومره واحده ضربت فى دماغى فكره وعشت فيها احلام الياقظه
.
لو الواحد يصرخ باعلى صوت عنده يقول اقف تلاقى كله حاجه حوليك مش بتتحرك او ترجع بالزمن

.
لتصحيح شويت اخطاء او تحقق حلم صحيت منه او تلحق قطر فاتك

.
انا هكلم عن نفسى فى الوقت ده انا هصلح اخطاء انا عملتها بس مش هقدر اغير معرفتى ببعض الناس
.
علشان معرفتى بهم عطتنى خبره وخلتنى اعرف الكويس من الوحش


.
اما تغير الظروف الى انا حبيت فيها مش ندمان على الى شوفته وقتها بس الى فهمته

.
انى انا استحق احسن منهم اما عن تغير مسار الدراسه انا طبعا مش هغير فيه حاجه علشان انا اتعرفت على ناس بجد جدعان

.
اوووووووووووى
.
ايه رايك تجرب الفكره دى ممكن تريحك من شويت اسئله محيراك وابقى قولى بقى شعورك بعدها عامل ازاى

.
stoooooop

.
.
joker

الثلاثاء، 18 أغسطس 2009

رمضان كريم

رمضاااااااااان كريم
.
كل سنه وانتو طيبين

.
ويارب نستفيد اوى من الشهر الكريم

.
باكبر قدر من الحسنات والتقرب من الله اكتر

.
والابتعاد عن العادات السيئه

.
انا مش هكون معاكم على طول

.
بسبب الدراسه وكده لاكن حد تانى

.
هيكون متبعكم ومهتم بالمدونه فى فتره غيابى

.
جوكر

.

من فريق : شبـــ اون لاين ـــاب






.
shemo

السبت، 1 أغسطس 2009

عشرة صدق


السلام عليكم

التاج دا جالى من حبيبة قلبى انوسة مدونة (ايناس الاحزان ) هو سؤال واحد بس عايز عشر اجابات
بس عجبنى اووى وحجاوب عنه ان شاء الله بصراحة جداااا.

بسم الله نبدا الاجابات

اولا: علقتى بربنا شىء صداق جدااااااافى حياتى على الرغم من انها اتهزت الفترة الاخيرة
بس بحاول اقرب من ربنا زى الاول واحسن علقتى بيه تانى.

ثانيا: شخصيتى مفهاش عمق بسيطة اووووى ووضحة وبتصرف بتلقائيا مع الناس
بحب الناس بسرعة على الرغم من اختلاف ردرود افعالهم وبثق فيهم برده
بسرعة عارفه ان دا شىء مش صح بس بحاول اغيرة لان الناس فعلا
مش كلها صادقة ولا كويسة .

ثالثا : ردود افعالى بتبان عليا جداااااا يعنى مخنوقة وشى يبقى مكشر ومش طيقة حتى نفسى
فرحانه ابقى بهزر مع الناس كلها ومبسوطة جدا.

رابعا : حبى او كرهى للناس بيبقى واضح اوووى مشاعرى اوفر يعنى لما بحب حد بيبقى الحب دا
بيدلق منى وببقى عايزة اعمله اى حاجة فى الدنيا تفرحه ولو كان دا على حساب نفسى
ولما بكره حد ببقى مش طيقاه ودا الحمدلله مش بيحصال كتير علشان صعب اوى
اكره حد او اخد منه موقف.

خامسا : اصدق حاجة فى حياتى هى حبى ياررررررررب يديمه عليا مش يحرمنى منه
خاص.

سادسا: 4 اشخاص ليهم تاثيرا كبير اوووووووى فى حياتى ومقدرش اعيش من غيرهم.

سابعا : بحب اوى الرسم وتصميم الازياء بحس انى بطلع انفعالاتى السلبية وانا برسم وبلون.

ثامنا: بغير على للى بحبهم بطريقة غبية لدرجة تخنقهم ودا طبعا بيبقى غصب عنى
ويارب مش يتخنقوا منى.

تاسعا : بحب الصداق اوى والصراحة مش بحب اللف والدوران وثقتى بتنعدم فى اى حد
كذب عليا ولو لمرة وحدة بس وممكن اقطع علاقتى بيه خالص.

عاشرا واخيرا : على الرغم انى ممكن ازعل بسرعة وانى عصبية اوووووووووى ودموعى قريبة جداا بس مش بحب حد يشوفها غير الناس الى بحبهم بس علشان هما الى حيقدروا الدموع دى على الرغم من كده انى بحط
اعزار للى حواليا وبحط نفسى مكنهم.
مرسى يا نوسة على التاج امووووووواااه

بهدى التاج

لمصر فى خطر
شباب اون لاين
للشاعر الحزين
وهعزف لنفسى
بكره احلى

ولاى حد داخل المدونة وعجبه التاج

والتاج اجبارى والى مش حيجوبه مش حيحصله كويس

*******************************************************************
كفاية كده علشان انا مش قولت عشرة بس قولت اكتر من وحدة فى النقطة الوحدة
حغيب عنكم شوية باه قصدى يعنى حريحكم منى شويةهههههههههههه علشان حبدا دروسى بعد بكره ان شاء الله
تانية ثانوى باه دعوااااااااتكم محتاجاها اوووووى وان شاء الله مش حغيب حاجى اطمن عليكم
علشان بتوحشونى.

دومتم بخير
اجابات بقلمى انا shemo

الثلاثاء، 28 يوليو 2009

ايقنت يومها معنى الموت


فقدتك فى هذا اليوم تعلمت حق كيف يكون الفراق وكيف وماهو معنى الموت
كنت اعرفه ولكننى لم ادرك حقيقته ولم ادرك ايضا قيمتك عرفت يومها انك اعظم شخص مرت على ايام
معه تعلمت منك الكثير والكثير دون ان اشعر .............نعم..........كثيرا كنت لا افهمك ولكنك فى النهاية
ولكن متى بعد فوات الاوان فهمت وتاكدت انك دائما وابدا كنتى علىصواب........لم اصدق حقا انه فات
على فارقك سنتين وكيف عيشنا جميعا بدونك وماهو الذى صبرنا على فراقك وبعدك انه الله وحده
الذى صبرنا على هذا بحسن خاتمتك الذى شهد لها الجميع.........حقا انك شخص غير عادى على الاقل
من وجهة نظر من يعرفونك.........دائما كنتى تتصرفين بحكمة فى كل شىء ......حقا كنتى عماد وميزان هذه
العائلة لم تعد جلستنا كما كانت من قبل مليئة بالدفىء والاحتواءوالحنان
بجد افتقتك كنت كثيرا اغضبك لكن هذا كان لصغر سنى وعدم نضجى وفهمى للامور ..........بعد وفاتك احسست
وكان الله قريب منى كثيرا لم اعرف وصف هذا الاحساس بقرب الموت وفهم معناه وكيف ان يكون فى حياتك شخص
ويذهب كانه لم يكن من الاساس.
وحشتنى اووووووووى نفسى اعيط فى حضنك زى زمان وابوس ايدك واعد وتكلم معاكى وتعلم الى مكنتش فاهمة انه غلط
عارفه ان الندم مبقاش ينفع بس هعمل ايه؟؟؟؟؟؟؟؟؟؟؟؟؟؟؟؟؟
احنا كبرنا يا تيتة زى ما كنتى نفسك تشوفينى وتفرحيى بينا سومة كبرت واتخطبت وبقيت عروسة زى القمر ........انا عارفه انك حاسة وفرحانه بالى احنا فيه وحاسة بفرحة ماما وجدو .........وانا كمان يا تية كبرت وان شاء الله حعمل الى عليا علاشن احقق حلمك فى انك تشوفينى مهندسة قد الدنيا وحفرحك بيا انا كمان ........نفسى اتكلم معاكى زيى زمان مش مصدقه انك مش موجوده
حولينا ومعانا ..............بس الى مصبرنى بجد على بعدك انى بدعى ربنا يجمعنا فى جنة الفردوس باذنه .


ربنا يرحمك ويسكنك فسيح جناته ويجمعنا فى جنة الخلد فى الفردوس الاعلى
__________________________________________
27\ 7\2009
الى جدتى الغالية رحمها الله
بقلم shemo

الاثنين، 13 يوليو 2009

ها هى الدنيا


ها هى الدنيا

فى لحظة واحدة نلتقى وفى نفس اللحظة ناس

تفترق

فى لحظة واحدة نحب وفى نفس اللحظة ناس
تكره
فى لحظة واحدة نولد وفى نفس اللحظة ناس
تموت

فى لحظة واحدة ننصف وفى نفس اللحظة ناس
تتظلم

فى لحظة واحدة نفرح وفى نفس اللحظة ناس تشعر
بالحزن والالم

فى لحظة واحدة تعطى لنا الدنيا ما نتمنى وفى نفس اللحظة
تاخد من ناس ما اعطت لهم

فى لحظة واحدة تضحك الدنيا فى وجهنا وفى نفس اللحظة
تعرض عن ناس اخرين

فى لحظة واحدة تشعر بالراحة وفى نفس اللحظة ناس
تشعر بالتعب

فى لحظة واحدة ننجح ونتفوق وفى نفس اللحظة ناس
تفشل

فى لحظة واحدة نخرج لافاق من الخيال وفى نفس اللحظة
تكون ناس فى الواقع المرير

فى لحظة واحدة نحلم وتتحقق احلامنا وفى نفس اللحظة
تضيع احلام قد تحققت لناس اخرين

ها هى الدنيا تعطى وتاخذ !!!!!!!!

بقلم shemo
شخبطة بقلمى الرصاص فى صفحات من اوراقى
الخاصة فى وقت فراغى




الأربعاء، 3 يونيو 2009

من غير عنوان


السلام عليكم
رجعت من الامتحانات والنتيجة طلعت الحمدلله ونجحت .........
معلش رجعتلكم بمود كئيب شوية ....لا مش شوية دول شويتين تلاتة .......حسيت انى مخنوقة اوى ونفسى
انفرج من العياط الى جوايا حاسة انى خايفة اوى على الرغم ان الاحساس دا كنت بحسه وانا لوحدى ودلوقتى انا
مش لوحدى معايا حد حاسه معاه بالامان اوى..... بس مش عارفه حاسة انى خايفة حتى من نفسى ......يمكن وقت
الفراغ!!! برده مش عارفه .....مش مشلكة يمكن خايفة لانى على طوال ودايما خايفة ان كل حاجة حلوة قلقيها تضيع منى......تعرفوا بخاف اوى حتى لما بحس بالامان مش عارفه ليه عندى احساس انى حتنينى على طوال لوحدى
يارررررررررب متكتبش عليا كده مش بطيق الوحدة ..........يارب خليك جانبى ومعايا .....تعرفوا يمكن اوكون مخنوقة علشان بعيد عن ربنا شوية يارب بجد محتجاك اوىىىىىىىىىىى خليك جانبى ومعايا.........
كنت مخنوقة دخلت افضفض معاكم فى البلوج يارب مكون زهقت حد او ضيقتكوا ..........ادعولى اخرج من المود دا.
محتاجه دعوتكم اوى.

الأربعاء، 20 مايو 2009

20|5|2009

السلام عليكم

كل سنة وانا طيبة ههههههههههه ........ كملت 16سنة لسه صغنونه صح هههههههههههههه
انا جيت انهارده بس اقولكم ان عيد ميلادى انهارده
ومش عارفه احتفل بيه ........ وووووووواااااءءء ........ علشان الامتحانات ان شاء الله ححتفل
بيه معاكم واجيب باه ترت وحجات حلوة كتير علشان انا هفتانه الايام دى هههههههههه وخسيت وبقيت
حالتى بالبلة ..........ادعولى تخلص الامتحانات باه على خير ........وارجع للنت والبولج وحشتنونى
كلكم اوىىىىىىى................ادعولىىىىىىى لحين انتهاء الامتحانات .
___________________________________________________
بشكر اوى صحابى المدونين الى افتكرونى وخصوصا شباب اون لاين

الجمعة، 13 مارس 2009

لو كنت كده تبقى اد الحب



اد الحب او قدرت تحب او تعرف تحب او عارف معنى الحب ولالالالالالا

اد انك تعيش عشان شخص ؟


اد انك تحزن عشان تشوف بسمه واحده منه؟

اد انك تموت ولا تشوفش دمعه واحده من عيونه؟


اد انك تضحى بعمرك عشان االانسان اللى بتبحه؟


اد انك تتحمل الالأم والصعاب عشان هو يعيش سعيد ومرتاح؟


اد انك تيجى على نفسك وتنسى حقك عشانه؟


اد انك تتحدى العالم وتقول ده حبيبى ؟

اد انك تموت لو اتخيرت بينك وبينه عشان هو يعيش؟


اد انك ترسم السعاده على وجهه طول العمر؟

اد انك تحافظ عليه وتحميه حتى من نفسه؟

اد انك تكمل عمرك معاه من غير جرح ليه؟

اد انك تخلص له بجد ؟؟


اد انك تحبه بجد؟

اد انك تعيشله بجد؟

تقدر تبقى اد كلمة ليك عمرى كله تقدر تستاهلها ؟

اد انك تبقى جدير بثقته ؟

اد انك تعيش الدنيا ليه؟

اد انك تشوف الدنيا بيه ؟

اد انك تنسى الدنيا وتفتكره هو بس ؟

لو مش اد كده اكيد متبقاش اد الحب.......؟؟
____________________________________

اعتذار :

معلش والله يا جماعة انا عارفه انى بتاخر فى تنزيل البوستات بس اعذورونى الدراسة .......مش مقطعاها اوى يعنى من المذاكر (بس علشان الحسد يعنى) هههههههههه.....بس والله ان شاء الله ححاول انزل على طول ومتاخرش عليكم.......بس عوزة طلب منك طلب الى بيتبعوا المدونة على طول عوزة تنبادل الافكار فى الموضوعات الى تهمنا تهم جيالنا وسن الشباب والمراهقين مشاكل حتى لو كانت بتبدوا من وجهة نظر حد تفه بس بدال بتمثل قلق لحد اكيد تبقى مشكلنا ولازم نفكر مع بعض فى حلها...........وياريت تردوا عليا وتقلولى رايكم فى الاقتراح دا وتنناقش مع بعض عن طريق التعليقات .......اوكى اتركم فى رعاية الله وحستنى انى اعرف رايكم.......سلااااااااموز .




الأحد، 1 فبراير 2009

ما اصعب



مــااصعب أن تبتسم ودموعك على وشك الانهمار


مــااصعب أن تضحك وداخلك جرح يصرخ


مــااصعب أن تحب شخص لا يعلم بحبك


مــااصعب أن تشتـاق لشخص وهوا يخونك في غيابك


مــااصعب أن تحب شخص رغم كل مافعله بك


مــااصعب أن تحـاول نسيان من أحببته منذ الصغر


مــااصعب أن تندم وقد فات الأوان


مــااصعب أن تبني الأمل على شيء مجهول


مــااصعب أن يقســى عليـك القدر


مــااصعب أن تحب شخص ويأتي القدر بكل سهوله ويفرق بينكم


مــااصعب أن ترى كل أحلامك تتحطم أمام عينك


مــااصعب أن تفقد شخص كـان هو كل أحلامك


مــااصعب أن تتمنـى المــوت من شدة ماتحس به من ألم


مــااصعب أن يأتيك خبر مـوت من هو حياتك


مــااصعب أن يجبرك الزمن علـى شيء لم تكن تتصور فعلــه في حياتك


حقوق النشر محفوظه لمدونه™ shababik