السبت، 19 مارس 2011

نعم .....لتطبيق ديمقراطية بجد


السلام عليكم

بغض النظر عن نتيجة الاستفتاء ذا كانت حتبقى نعم او لأ

وبغض النظر عن موقف ورايى كل واحد فينا وقولنا اما روحنا لجان الاستفتاء

نعم او لأ

الا ان بجد اليوم النهاردة حلو اوووى

وبجد معاملة الجيش ع مستوى اعلى والروع كمان من تطبيق القانون ومن المستوى الى كنت متخيلاه

مش بيحترموا النظام بس بيحترموا كمان الانسانية

(كانوا بيدخلوا كبار السن والعجزيين بعيد عن الطوبير وطوبير يعنى طوبير مش تهريج)

।ع الرغم ان حصلت كذا حاجة حرقت دمى من ناس مش فاهمين معنى الحرية الى ثورة جبيتهالنا

_

انا مسنحتليش الفرصة ان اقول رايى عشان لسه مش كملت 18سنة

بس كان رايى الايام الى فاتت ان الفكرة مش فكرة

نعم او لأ ع قد ما هى فكرة ان تجربة الاستفتاء دى تجربة لتطبيق الديمقراطية والحرية

الى كل واحد فينا كان بيحلم بيها من قبل الثورة والثورة قامت عشان تحققلنا الحلم دا

بس ع راى شاب فقرى /المصريين اخدوا الحرية بس نسوا ياخدوا

الكتالوج بتاعها فدلوقتى بيلعبوا فى الزراير وكلوا بيخبط

_

رغم السلبيات وطبيعى يبقى فى سلبيات لاننا

مش حنصحى الصبح نلاقى كل الناس بقيت كويسة والبلد التغيرات و الفقراء اتغنوا

زى ما متخيليين الناس المحبطة الى بتقول البلد دى عمرها ما حتتغير

بقول كدا كمان ع نقطة الحرية لان فى ناس حتى ع المستوى الضيق فى النقاش

مش بتحترم راى الاخر وانت بتقول رايك تلاقى واحد يروح طالع وقيلك انت

تييييييت وبتفهمش حاجة

_

انا نزلت معاهم فى البيت عشان كنت مشتاقة بجد اوى اشوف الفرق بين الاستفتاء دا بعد الثورة

وبين الانتخابات الى عمرنا ما نزلناها فى حياتنا

لاننا كنا عارفيين ان فيها تزوير

وانهاردة نزليين واحنا مصمميين ومتاكدين ان راينا حيأثر وعارفيين

ان مش حيبقى فى ولا بلطجة ولا رشوى ولا تزوير

ع الرغم ان فى ناس بتعمل حجات عجيبة مش فاهمة هما مش وخديين بالهم ان الناس

خلاص فاقت وبقيت خلاص بتفهم وحتبدأ تعرف حقوقها وتقول بصوت عالى لأأأأأأ

فى وش الى ياخد حقهم

فجيين الناس دى قبل يوم الاستفتاء

زى (ما يطلقون ع انفسهم الدعوة السلفية )

يعدوا فى الشوارع بميكروفونات

ويقولوا للناس ندعوكم لقول نعم فى الاستفتاء غدا

مش عارفة حيفهموا امتة ان الشعب الغلبان دا خلاص مش حيبقى غلبان تانى ولا حيرضى

ياخد ع قفاه فيتعمدوا انهم يضللوا الناس

اما انت تكون انسان بسيط وثقافتك محدودة ويكون مثلا رايك لأ

وتلاقى حد جاى يكلمك ويقولك لا قول نعم عشان المادة 2 من الدستور متتحذفش

وانت معندكش غير معلومات محدودة بتقول انك تقول لأ

عشان الثورات بتغير وبتسقط الدستير

متعرفش اية الى حيحصل اما لمادة دى متتشلش ولا حتى تتشالش

وكدا كدا الدستور حيتغيردلوقتى او بعد فترة

حيكون موقفك اية اكيد حيكون موقفك انك حتترد الف مرة وتتلغبط وتكون مش عارف تاخد موقف

_

حاجة تانية شوفتها بيعملوها

الى بردوا بيطلقون ع انفسهم انهم

(الاخوان المسلمين )

ع الرغم انى اصبحت اعتقد انهم لا يمسون للاسلام بصلة بعد مواقفهم العجيبة

بعد الثورة ما علينا

وصلنا عند اول الشارع الى فى المدرسة الى العيلة

ريحة تقول رايها فيها ولاقى تلاتة منتقبات علمت انهم من الاخوان المسلمين

مليووون خط تحت اسلوب لبسهم للنقاب

(يريدوا ان يحكموا البلاد بالاسلام بهذا الاسلوب ع الرغم نفيهم لرغبتهم فى الترشيح للرئاسة )

(يتمنعن وهن الرغبات)

وع اعتبار انهم كانوا يطالبون بالحريات والديمقراطية

المهم قربوا مننا وسئلوا حضرتك حتقولى اية نعم ولا

فكان الرد ع ما اعتقد ان دى حرية شخصية ومحدش لية يسئل حتى السؤال دا

وبذات فى الوقت دا وفى المكان دا يعنى

فكان ردهم اه طبعا انا مشيت عشان دمى ميتحرقش من المناقشة الى فى مكان غلط اساسا

وسيبت باقى الى كانوا معايا وقفين معاها

واعتقدت انها مجرد مناقشة من ناس متطفليين

عرفت بعد كدا بأه انهم كانوا بيقنعوهم يقولوا

(......)

الكل يعلم ما رايى الاخوان المسلمين +الحزب الوطنى ايضا

(بواقى الحزب الوطنى )

(حموت واعرف بقى الجهتيين دول اتفقوا ازاى)

ها هم الاخوان المسلمون من ينادون بالحرية والديمقراطية

يفرضوا بأسلوبهم المتطفل رايهم ع الاخرين

نفسى بجد الكل يفهم بقى ان الثورة دى قامت اساسا عشان تدعم وتحمى الحريات

مش عشان نتناقش بهمجية وتخلف

مش عشان نتسابق فى ارغام الاخر ع الاقتناع براينا

وهى اساسا وراها مصالح

بلاش نمشى وخلاص بعمى ورا النخبة

(عمرو خالد قال لأ ورجع قال نعم رحت ناس مغيره رايها عشان رايه )

اى واحد بنحترم شخصيته منهم مش نقتنع برايه وخلاص لأ

نسمع دا ودا ودا ونفكر ونحلل

وناخد قرار قرار مرتبط بشخصيتنا احنا ووعينا السياسى

ميبقاش فى حاجة اسمها حد مش مثقف ومش واعى

ميبقاش فينا حد سلبى وعارفة ومتاكدة ان خلاص الروح السلبية دى ماتت

يارررررررررررب

يكون الى جاى خير وربنا يقدر لبلادنا ما فية الخير ويحمينا ياررررررب

واللهم انت اعلم بما فى ناويهم فوفقنا لما فيه الخير لبلادنا والهمنا الصواب

__________

كلمات من منطلق فكرة الحرية

بكلماتى

shemo


حقوق النشر محفوظه لمدونه™ shababik